近年不少親子網湧現，提供平台讓家長交流。去年底成立的「百家寶」短短半年已有八千人登記。不以討論區作主打，創新推出家長日誌、專家意見、甚至搞活動、出故事書、季刊等。創辦人劉雪文（Michelle）話希望家長能彈指間處理及了解所有育兒資訊，將來，更不只是網站，而是一整個親子集團包辦一切和育兒有關的服務。果然擲地有聲！
記者：林佩婷
攝影：王文忠
一站式家長日誌
試想想，做父母每年為子女搞N項活動或派對時，都要打一大串電話訂餐點、搵場地、搞佈置等，極易掛一漏萬。Michelle：「家好多父母都要返工，淨係約人打電話又或結束後曬相畀人都好煩，所以特別設計網上『家長日誌』，希望父母只係用一個Lunch嘅捱麪包時間就可以上網搞掂晒。」此日誌就像時下流行的Facebook，可以選日子向朋友群發邀請，然後再從網上選擇場地、食物、玩具等功能，聯繫到日誌內家長便一目了然。到活動完畢後寄回感謝卡及發相，可謂一站式搞定。
除家長推崇的日誌服務外，網站另一特色是邀請不同專家為0-12歲小朋友各種發展寫下專業文章，亦不時邀請他們舉行講座，跟其他齋Talk的討論區亦有好大分別。
囝囝做白老鼠
網站兩大特點滿足家長需要，曾從事市場策劃及開音樂學校的Michelle，為了囝囝便辭去工作，亦因為囝囝而生HomeOffice念頭，在開創網站之初，就鎖定中產階層為目標，3歲囝囝Markus更是她發展網站的主力測試員。「開音樂學校嗰陣就知道做生意唔可以貪心要有Focus，中產係指消費力，家長必然會為子女安排最好嘅嘢，所以我搵嘅專家都係要有知名度。至於服務同產品，我就會親自試過先放上網，仲會帶埋Markus去試，因為小朋友嘅反應最真實。」
多元化橫向發展
現公司約十個員工，她主力推廣，老公則負責網站設計等I.T部份。除保持網站最新資訊外，還出版故事書、季刊及定期活動，Michelle亦會寫Blog和家長分享心得，並將其他和小朋友有關的內容連結於網站，橫向發展成一個集團。「網站只係一個開始，其他好似季刊希望家長睇完會Keep做天書。每年又會搞三、四個可容一、二千人嘅大型活動。總之，我希望將來發展成育兒集團，只要一Click上去想要咩小朋友資訊都搵到，咁就係我最終目標。」
家長Priscilla
網站日誌設計最符合我嘅需要。
Sandy
網頁按小朋友年齡分類好方便。e-Newsletter仲update新資訊。
網站： http://www.peegaboo.com