夏日炎炎，今年嘅G8峯會就在文化歷史悠久嘅意大利中部城市拉奎拉舉行，如果唔係眼前有咁多經濟問題未解決，相信班「癡癡呆呆坐埋一枱」嘅各國首腦索性當放暑假唞暑，懶洋洋咬住個比薩晒住個太陽，傾到啲咩吖！
今年峯會前出現唔少插曲，平權部長及教育部長都係女人，佢哋都係性醜聞纏身嘅意大利總理貝盧斯科尼揀選嘅，而佢老婆就因為跟佢搞緊離婚，擺到明唔會以第一夫人身份出席，位平權部長就係前意大利小姐，仲幾靚添。
有團體呼籲班G8第一夫人抵制貝盧斯科尼，皆因佢嘅性醜聞實在太有辱國體，而本身係意大利人嘅法國總統夫人布魯妮，一向與呢位「老尚風流」的意國總理有過節，更加唔會畀面佢，甚至公開拒絕出席唔少活動，呢位夫人率性而為，有性格。
難搵資源搞環保
今次揀意大利舉行峯會，話題主要針對經濟、環保及食物安全，正所謂家家有本難唸的經，實在好難有共識，論失業問題大家已不相伯仲，預期歐盟成員國較美國更早行先一步見雙位數，美國經濟未見起色，已急不及待討論緊第二輪刺激經濟方案，反映佢哋仍然水深火熱，一邊要救經濟，另一邊又要推環保，但係唔好忘記環保呢一瓣係要好靠政府支持，邊度仲搵到咁多剩餘資源去搞吖！美國好多家上市嘅環保企業都唔係咁賺錢，環保其實係長期抗戰，不過好多人當概念咁炒，炒爆都未見米熟。
今次揀意大利舉行G8峯會，有啲九唔搭八，上周日英國智庫組織新經濟基金會（NewEconomicsFoundation）就公佈咗佢哋搞出嚟嘅快樂星球指數（HappyPlanetIndex,簡稱HPI），原來在143個國家之中，意大利排名66，已經係8大工業國（G8）當中排名近最高位，而美、英、法、德及日本則只分別排於114、74、71、51及75名，但排名頭三位嘅竟然係哥斯達黎加、多明尼加及牙買加。
中國排名20，香港則排名84，仲差過伊拉克。智庫組織似乎明顯將快樂與預期平均壽命、居民對生活滿意程度、食唔食素及使用多少地球資源換取滿足與快樂掛鈎，換言之，攞高分數高排名必須具備唔危害地球資源之要求，完全背離以GDP計算的慣常做法，揀正在7月4日即G8峯會於7月8日舉行之前出爐，話佢背後無政治涵意就講都冇人信。
胡孟青