食物及衞生局副局長梁卓偉早前頻頻就豬流感上鏡，成為最紅副局長，可能人紅就囂，得罪咗議員，遭立法會帳委會去信唐英年投訴。
是咁的，梁卓偉上月在立法會一個委員會會議上，引用帳委會報告部份內容，指政府街市加租係因為帳委會認為公眾街市收平租不利庫房收入，言下之意，加租係議員意思。街市販商眾多，動員力又強，係大票倉，梁卓偉唔使選就信口開河，議員卻唔敢得罪販商，高官指議員建議加租，與民為敵呢個罪名冇人想孭，因此議員要嗆聲，以正視聽。
帳委會批評梁卓偉斷章取義，陷議員於不義。袋巾梁家傑指政府要加租就借議員過橋，直斥梁副局屈人。觸及選票嘅嘢，切勿亂講，八方希望梁卓偉今次學到嘢。