轆Book:初揸Porsche陳鍵鋒:惡得嚟易搞

轆Book:初揸Porsche
陳鍵鋒:惡得嚟易搞

喺即將播映嘅新劇入面,斯文靚仔嘅陳鍵鋒(Sammuel)會突破性一人分飾兩角,飾才子周文賓兼其美人胞姊。今日,佢都嚟次新嘗試,就係第一次揸波子,雖然佢以「載到屋企人」為揀車條件,不過波子就畀到佢新體驗:「估唔到馬力大性能高又咁惡嘅車原來好受控」。

記者:梁美甜
攝影:周旭文
車輛提供:PorscheCentreHK

好多男人由細到大都好恨有部波子,又或者退而求其次揸吓都好!不過Sammuel就話:「我唔恨,或者一開始就已經將揀車要求定位喺日常代步啦!」

樣靚有實力

Sammuel直言,直到今日都未試過揸波子,既然Sammuel未試過波子,今次就找來呢部高度操控性能版本CaymanS畀佢試玩。09年新款性能版CaymanS,新式LED日光燈及霧燈組設計加上火紅色外形,採用導入DFI技術嘅3.4公升六汽缸引擎,搭配7前速PDK雙離合器波箱,馬力輸出高達320匹,0-100km/h加速以往1.2秒,只需4.9秒,燃油效益更優異,整體性能表現及操控更勝上一代。紅色不時會令人聯想到女人,火紅CaymanS就如Sammuel般,帶點女性嘅艶,外形也充滿時尚,卻擁有深厚實力。Sammuel唱歌出身,入公仔箱後才作多元發展,「演戲方面無接受過任何訓練,反而更得到觀眾認同!」我聽過Sammuel唱歌,尤其係國語歌,有着台灣男歌手那份韻味,我認同他的實力。

■Sammuel揸車夠晒穩陣,試過基本嘢至試Sport系統。

■車身拉花更清楚顯示跑車型號,但要額外付款囉!

■行李廂對經常出埠嘅Sammuel而言太細。

■內裝亦用上火紅點綴,與車身顏色呼應。

馬力大唔嚇人

甫上車傳來叫喊聲,佢未嚟得切驚喜讚嘆,就先挖苦我:「乜你對腳咁短㗎!」原來我將座椅推得太前搞到Sammuel上唔到車,佢連講幾次,搞到我都懷疑自己對腳係咪真係咁短。
「隆……」引擎一聲咆哮,火紅Cayman揚長而去,Sammuel跑了一圈返來後輕鬆道:「部車惡,馬力大,揸起嚟照計會驚,估唔到會咁受控。畀油即去,反應快,Brake亦反應靈敏,就連拖波轉波都出奇地順,車櫳亦無想像中咁嘈……」新款Cayman車系將中置引擎壓縮,並為內櫳加強靜音功能,騰出更多空間之餘,亦令車廂更靜。「跑椅亦出奇地舒服,唔……係無天窗覺得有啲壓迫感,同埋行李廂太細,我每次出埠都兩大個行李篋,實放唔落!油錢都唔平啦?」又唔係喎,相對於以往,一缸油未必行到成三百幾公里啦,仲要係長時間停車開冷氣及以令波箱轉波速度更快、懸掛反應更硬嘅SportPlus最強性能表現來轟車,咁嘅耗油量,仲想點?

■中控上嘅時計係SportChronoPackagePlus一部份。

■喺試車過程中,加裝嘅導航出奇準確。

■鮮紅安全帶及真皮跑椅,前者屬加裝配備!

後記
少爺長大了

訪問當日早上致電Sammuel要求他穿得Man點,原來他已出門。到拍攝場地,居然發現Sammuel去買了件西裝褸,「表示誠意嘛!」然後餵蚊餵足粒幾鐘都無黑面,態度專業。佢解釋:「接拍《王老虎搶親》將個人形象及思想推倒及重組,人成熟咗。」少爺仔長大了。

■靚女小姐扮相,驚為天人。

PorscheCaymanS規格

引擎:3,436cc水平對向六汽缸
馬力:320hp/7,200rpm
扭力:370Nm/4,750rpm
傳動:PDK7前速雙離合器波箱,中置
售價:$948,000起
查詢:PorscheCentreHK(29262911)