今年公務員薪酬趨勢調查結果備受爭議，更有差人一度諗住上街抗議，管職雙方關係似乎幾僵，立法會公務員及資助機構員工事務委員會噚日舉行會議，與會九個公務員團體圍攻政府代表，指政府高層耍小動作，不具名透過傳媒抹黑公務員輸打贏要，唔肯減薪。
公務員事務局局長D姐俞宗怡首當其衝，面對員方同議員連環批評，D姐似乎有感而發，講出心底話。佢話管職雙方喺薪酬調整問題有爭議不足為奇，最痛心係事件令公眾對公務員團隊有負面印象；D姐誓神劈願，強調自己個人同成個局，從來冇透過傳媒與職方謾罵，亦唔會在背後搞小動作，反指好多時係傳媒張冠李戴，描述一啲唔存在嘅事，言下之意，即係賴傳媒生安白造。
高官唔想做箭豬，以「消息人士」做護身符，匿名向記者放料十分常見，D姐為官多年，相信對呢種遊戲不會陌生，佢自己冇詆毀公務員，唔代表其他「消息人士」冇出手，輕率卸責傳媒，先係真正不負責任。記協噚日即時回應，批評D姐指控毫無根據，應該道歉，又呼籲傳媒日後唔好同公務員事務局玩這種放風遊戲，免得成為代罪羔羊，無辜孭鑊。