老董下台換上公務員治港，有人話唔單止代表商人治港試驗失敗，亦象徵上海幫失勢，但今時唔同往日，家陣中央講到明要撐上海發展成國際金融中心，直接同香港爭食，假如香港上海幫回朝，自己人同聲同氣可能多啲偈傾。地產界議員石禮謙都係咁諗，噚日喺特首答問大會上，以上海話「儂好」同煲呔打招呼，笑言要同上海競爭，必須曉得上海話，否則好蝕底。
唐唐笑到反肚
可惜煲呔係番書仔，飲香港水、流香港血，唔識上海話，一味儍笑答唔上嘴。石禮謙繼續講，話港滬大把合作機會，為免落後於形勢，下任特首最好識得上海話，呢個時候，輪到坐在一旁嘅政務司司長唐英年笑到人仰馬翻，好多議員亦指住佢狂笑，因為唐公子祖籍江蘇無錫，幼受庭訓，上海話自然難佢唔到。
唐公子對特首寶座嘅野心路人皆見，八方請教過上海朋友，要話某人好鬼「恨」做特首，可以咁講：「阿拉邪氣想做一隻鼎。」「一隻鼎」即係一哥、No.1咁意思，據講呢個係最地道老上海說法。假如下任特首要識上海話，唐公子係不二之選。好彩仲有幾年時間，家開始惡補都未遲，另一個疑似特首候選人梁振英籍貫山東威海，據說細個時被父母迫學山東話，以示不忘本，至於上海話，八方罕有聽佢講，如果真係要參選特首，相信佢要下啲苦功。
振英哥要惡補
講過N次第N屆都唔選特首嘅梁振英，近日改口，如果唔想落後唐公子太多，八方醒你一句即炒即賣上海話，下次再俾人問到係咪去馬選特首，可以咁樣答：「晚一眼脫儂講。」即係遲啲同你講咁解。學一種新語言，有人話最好在當地搵個女朋友或者男朋友，保證火速琅琅上口，怕且梁振英唔敢公然搵個上海寶貝補習，近水樓台，不如搵老董私人教授。
石禮謙會後同八方講，佢認為下任特首應該識講上海話，唔係純粹搞笑，而係覺得真係有此需要，正所謂知己知彼，要同上海爭一日長短，如果香港特首通曉上海話絕對有好處。佢又話若然梁振英真係有心出選，就要快啲學好上海話嘞。
mailto:[email protected]