香港富豪第二、三代嘅運動喜好真係幾特別，舉個例，合和實業（054）太子爺、聯席董事總經理胡文新鍾意打冰上曲棍球，噚日同新世界發展（017）主席鄭裕彤排第三嘅孫仔鄭志明（Brian）食晏，至知原來佢除咗鍾意踢足球，仲喜歡玩閃避球（dodgeball）。
富豪後代愛運動
閃避球嘅玩法好簡單，6人對6人，全場6個波，兩隊互掟，被掟中就要out，相反，如果接得住個波，對方球員就要out，自己嗰隊仲可以加番個人落嚟，玩完一粒鐘，最高分嗰隊就贏。香港仲有個香港閃避球總會㖭！
Brian話，閃避球好玩之處，就係局面隨時扭轉，即使自己嗰隊得番一個人，如果佢可以接住啲波，叮走對方球員，又可以加番人入場，咁就可以反敗為勝。不過，作為球員，其實好多時都係企喺度等畀人掟。
除咗玩閃避球，Brian閒時又會去踢足球，佢話自己鍾意走動，所以打翼位。不過，華華懷疑佢其實係想學同樣打翼位嘅碧咸同C朗至真！鍾意得踢波，自然亦愛睇波，Brian係阿仙奴擁躉。
佢仲話，其實睇啲球會點買賣球員、點運作，都學到營商之道喎！
李華華
mailto:[email protected]