金融服務界議員金勞詹早幾日出席《城市論壇》時，同現場觀眾及其他嘉賓拗到面紅耳熱，最後更拂袖而去，創造《城市論壇》嘉賓中途離場歷史。呢個咁難得一見場面，同時創造另一項紀錄，香港電台方面報喜，話當日錄得收視率增加一點，即係多咗成六萬人收看！
據講《城市論壇》一般收視大約五點多少少，星期日中午時分，大家未起身，或者出咗街飲茶，有五點收視都算不俗；剛剛過去嘅一集，竟然有逾六點收視，八方聽聞港台方面喜出望外，估唔到忽然多咗觀眾。
港台歸功於金勞詹，多謝佢傾情上鏡，其次要多謝毓民，因為好多社民連fans上網重溫當日《城市論壇》，令節目人氣驟升。