葉童昨日在灣仔出席美容活動，大發牢騷，不滿近日同返內地拍劇的劉松仁。影后級女星葉童自言是惡婆，卻遇到完美主義者劉松仁，寸他每場戲都要指導及帶領，意見多多，暗示他霸道，葉童更表示不會順從他。
葉童、楊恭如、任葆琳及李樂詩等昨日現身灣仔君悅酒店，出席護膚品牌MTM舉行的慈善活動。談到工作，葉童透露早前到深圳，與劉松仁拍攝TVB新劇《摘星》，一見記者即大吐苦水：「雖然以前同佢合作過，都係唔習慣佢嘅模式，佢好多意見，要點、點、點，要你接受，我唔鍾意人管我，佢係完美主義者，每場戲都要plan過。」
「我唔會聽佢支笛」
松哥此舉會否影響二人感情，葉童表示：「有啲啲，佢都好，我都係對事唔對人，我仍然對部戲好有熱誠，都有自己發揮嘅空間。」問她會否覺得松哥霸道，她笑笑口說：「睇人，我呢啲係惡婆，唔會，佢會用另一種方式對我，我唔會聽佢支笛。我好欣賞佢鍾意研究人哋啲角色，好犀利。」記者笑言松哥睇人恰，葉童說：「唔係，佢鍾意幫後輩，我都唔知佢點同人溝通，可能有啲人希望有人指導同帶領，遇到呢啲咪好開心。」
任葆琳凸肚晒命
此外，任葆琳豐滿了不少，惹來大肚疑雲，記者致電向她求證，她即笑笑口表示：「梗係唔係大肚，我唔贊成未婚產子、未婚產女。我肥咗一段時間，都肥咗成30磅，我不嬲食嘢都係地盤佬份量，每一磅都好值，我仲同朋友講，我男朋友咁瘦，見到個女友肥咗咁多，證明佢對我係真心。不過自己都會收斂吓，會減吓肥。」問到何時與日籍男友拉埋天窗，任葆琳表示現在一半時間在日本住：「大家都想，不過我忙緊投資，佢又忙緊開餐廳嘅業務。」
採訪：IngridChan
攝影：PangChungYin
