成立於1973年，由製造香皂的家庭式工業發展成跨國企業的Crabtree&Evelyn，上周三申請破產保護（Chapter11），欠債規模唔係天文數字，只係最多約5千萬美元，1千位債權人。這間美國公司，行嘅係象徵優雅路線，成功營造高貴形象，引證美國人最成功嘅地方，就係懂得包裝。無論金融產品定係消費品，先搞起個品牌，產品就會大賣，美國人確係最佳推銷員。
呢間公司嘅分店全部開在貴重地段，淨係美國曼克頓都有4家分店，斷估就算佢幾唔掂，都唔可能走入尋常百姓家，甚至紆尊降貴進入領匯（823）屋邨商場吧，係就真係不敢想像。奢侈品係飽暖先至可以負擔嘅，華爾街滿目瘡痍，已經養唔起咁多間舖。內地社會消費品零售分項數據顯示，中國居民在家具、金銀珠寶及汽車消費仍分別增長33.3%、28.7%及23.8%，反觀香港就係下降5.7%、11.5%及38.2%，我哋只有超市銷售部份仍持續有增長！
維持高檔形象最重要
Crabtree&Evelyn要衝出重圍，一定要保持佢一貫予客戶嘅感覺，中國人信品牌，要繼續令人自覺只要用其產品如肥皂、香水、護膚露、沐浴露，就有如沾上一種皇室貴族的氣息，千萬不可破壞呢個品牌形象，更加唔可以好似Hummer或者PierreCardin咁賣俾中國，否則好易玩完，起碼現時大家仍未知佢母公司其實係馬來西亞棕櫚商。
早幾年曾經買咗一對PeterRabbit毛公仔送畀人，但係就冇買過任何嘢益自己，原來身邊好多女性朋友都幾鍾意收到呢隻牌子嘅產品禮物，間公司現在亦正處於水深火熱，嚟緊應該有好多大減價機會，香港男仔要識做嘞。
不過就業市場直接影響消費市道，歐洲股市同樣連續三星期向下，成為自今年3月以來最長跌市，復蘇只係海市蜃樓，16個歐元區成員國嘅失業率經修訂後，原來仲弱過美國，因為佢哋5月份失業率原來已達9.5%，而美國到咗6月份先至同歐元區看齊。歐美每9.5個人就有1個失業，都咪話唔恐怖。好又一餐，唔好又一餐，君子能屈也能伸，講就容易！剛剛要求債券持有人大幅haircut嘅德國女裝名牌Escada會唔會肯委曲求全，好成疑問，短債變長債，俾足10厘息，擺明係買時間。名牌嘅經歷，再一次考驗佢地是否真的威武不能屈。
胡孟青