高官要減薪5.38%，煲呔帶頭同一眾問責局長、副局長、政治助理玩縮骨，減薪睇齊高官而唔減多啲，好多市民睇唔過眼，社民連長毛揚言要對付佢哋，佢果然唔係齋噏，白紙黑字起草私人條例草案要求問責高官減薪25%，交法律草擬專員過目，獲確定草案措詞冇問題。
律政司放行，代表長毛已過第一關，第二關就要面對立法會主席曾鈺成。《基本法》規定主席審批議員私人條例草案，要視乎草案是否涉及政府政策同令政府有額外開支，曾鈺成會否以此兩大法寶玩死長毛草案，大家心中有數。
長毛則話希望曾主席站在人民一邊，幫市民消消氣，佢會嘗試游說其他黨派支持。