越是期待越是美麗，日本國民RPG《勇者鬥惡龍IX星空的守護者》幾經延期，等到頸都長埋，今個星期尾終於有得鬥惡龍喇！今次NDS畫面冇乜驚喜，不過可以帶出街篤住煲，仲首次可以湊齊4隻腳連線玩，加上自定角色、唔同裝備配搭出不同時尚值等玩嘢設定；各位猛男，係時候搶番女友部NDS喇……一個月吖唔該！
文：阿洛
落入凡間有忠有奸
自第六代後，《勇者鬥惡龍》嘅正式續篇終於回歸任天堂主機懷抱，呢個夢幻組合，令筆者諗起讀緊書，「吸」碟玩紅白機第三代時嘅畫面，細細個對住堆日文平假名選單靠估逐行試，嗰份堅持真係唔講得笑。
嚟到九代，人大咗好難再咁堅持，埋嚟食個快餐了解故事先啦！故事起源於「天使界」，裏頭班守護天使一向要落凡間收集人類感激之心嘅結晶「星之氣」，令「世界樹」結出「女神果實」，先開啟到通往神國嘅道路，而玩家操作嘅主角就好明顯係其中一位守護天使，一邊冒險卻一邊發現唔多妥，原來有陰謀嘅！
男人要以事業為重
傳統RPG，同你畢業嗰日一樣，開始時要揀份職業，遊戲入面有戰士、魔法師、僧侶、武鬥家、盜賊等選擇，人生都相當多姿多采。同現實最唔同嘅係，Game入面你做得唔開心咪走囉，無論你或者你嘅同伴，只要去神殿搵神官就可以轉職，有熟人介紹係方便啲。而只要符合特定職業等級限制，加上通過特定委託任務，更加可以成為戰鬥大師、聖騎士、魔法戰士、遊俠等「高階職業」嘅專業人士。
冇Wi-Fi要出街
遊戲系統同系列舊作回合制冇乜大分別，不過就可以喺畫面見到敵人。新嘢都唔少，例如首度可以自定角色，髮型、體形等全部自己揀，最搞笑係你一邊玩一邊配搭唔同裝備上身時，係會計一個叫時尚度嘅數值，夠潮一定有着數。
而另一標榜嘅賣點，係可以無線連線4人參戰，雖然搞咗咁耐都係冇Wi-Fi上網合作，不過掉轉諗，廠方都係為我哋好咋，暑假唔好咁自閉，打機都要出街見吓朋友食個8號餐加大㗎！
Profile
遊戲：勇者鬥惡龍
機種：NDS
發行公司：SQUAREENIX
類型：RPG
人數：1人、wireless連線4人
推出日期：7月11日
