馬會行政總裁EB應家柏真係八方偶像，講到佢嗰種呼風喚雨吹雞晒馬嘅能力，連遊行搞手民陣都要行埋一邊。馬會一話要增加賽馬日，咩蔬菜魚蝦蟹團體都團結起來，紛紛企出來撐馬會。好彩德成局長最終順應馬會要求，如果唔係，EB真係拖埋啲馬上街都似。
立法會民政事務委員會幾日後討論增加賽馬日嘅事宜，政府都批准咗馬會嘅申請，都唔知仲有乜好傾。連做橡皮圖章資格都冇嘅立法會議員，噚日收到會議文件，包括一堆公眾意見嘅節錄。唔睇由自可，一睇笑死咗。
神父感恩圖報撐跑馬
19份意見當中，有13份贊成增加賽馬日，呈交意見嘅有團體同個人。呢班嫌香港跑馬日少得滯嘅團體，包括華記菜檔、青山海鮮、香港防癌會、香港青年協會等等。究竟跑多幾場馬仔，同菜檔、魚檔有咩關係呢？又點解賽馬可以防癌呢？
華記菜檔話，賽馬日佢哋會接多兩、三成定單，增加五日賽馬可以帶挈多啲生意。八方點都諗唔明，馬仔就話跑完要食多兩棵草啫，馬迷賭完馬都要食多兩箸菜㗎咩？華記又話暑假學校放假，對菜檔生意有一定影響，賽馬日可以拉上補下。咁樣講法，全港菜檔係咪應該爭取學校唔好放暑假？
青山海鮮則話，賽馬日帶動馬場內外餐飲生意，所以海鮮同業都殷切期望政府通過增加賽馬日咁話。青山海鮮有網頁，八方一睇，發現原來馬會係佢哋大客，有生意往來，唔怪之得咁撐馬會。青山海鮮何不建議馬會開埋魚蝦蟹大檔，咁樣賭客對海鮮嘅需求將會更加殷切。
講到尾，呢啲九唔搭八撐馬會嘅團體，都係受惠於馬會嘅拍乸。好似香港青年協會咁，上年獲得馬會過千萬元撥款，家馬會要尋求聲援，又點好意思托手踭？所以呢，連香港明愛總裁楊鳴章神父都響應號召，挺埋一份，佢份意見書話：「明愛不是提倡賭博，不過…馬會絕不會將來自賽馬的收益中飽私囊，而只會用於支持慈善社會活動…」飲水要思源，感恩應圖報，不要問馬會為你做過甚麼，應該問自己能為馬會做些甚麼！
mailto:[email protected]