今屆候選港姐雖然質素平庸，但佢哋嘅是非就日日新鮮，噚日馮仁昭收到幾個候選港姐嘅爆料電郵。第一單係話7號鍾溥敏讀樹仁大學一年班時，喺大考出貓，俾監考老師發現，之後鍾溥敏出貓嗰科考試被取消資格，件事仲以通告形式貼咗喺學校報告板度。
4號劉倩婷密友有米
至於被傳性取向成疑嘅4號劉倩婷，就被爆話佢嗰位交往咗十幾年嘅同性密友叫KittyChan，佢個爸爸係有20億身家嘅內地地產富商，劉倩婷同Kitty當年喺英國名校RoedeanSchool認識，佢哋係密友兼室友，劉倩婷今次參選，Kitty仲不停為佢拉票，關係非比尋常咁話。
另一單係同6號黃嘉麗有關，報料者話班港姐日前去番禺拍外景，咁啱佢有個朋友喺番禺間酒店打工，佢聽到黃嘉麗猛彈內地污糟，唔明啲人點喺度生活同旅遊，簡直係浪費佢啲時間。報料者又話朋友要求同黃嘉麗合照，點知佢打爛沙盆問到篤之餘，仲同其他佳麗講咗句：「大陸仔！」朋友話send番啲相畀黃嘉麗，點知佢話唔使，因為同佢距離好遠，態度差到冇人有，唔明佢點解有資格被選做香港小姐旅遊大使！
各位讀者如果認識十位入圍港姐，知道佢哋嘅底細，歡迎電郵mailto:[email protected]報料。