前晚由費達拿對盧迪克嘅史詩式溫網賽男單決賽，曼聯領隊費格遜都係座上客，但全場就嬲爆爆。點解？可能同兩愛將朗尼同馬捷達有關，事關佢哋一個搞到隻耳仔差啲冇咗，一個就俾狗仔隊影到狂煲煙。
費爵爺喺基斯坦奴朗拿度同泰維斯離隊後，簽咗個廢咗一半武功嘅奧雲，家陣朗尼同馬捷達嫌佢未夠煩，夾埋整兩單咁杰嘅嘢佢嘆，佢啲火扯到上心口，真係食龍肉都冇味，仲邊有心情睇波呀！
朗尼傷耳縫45針
我求大俠聽英國啲行家講，朗尼同有咗身孕嘅老婆高蓮，同埋班朋友去法國度假；點知樂極生悲，上個禮拜五朝早喺佢艘豪華遊艇跣親，好彩手腳冇事，但隻左耳就遭殃，仲要入院縫咗45針。據聞佢耳仔嘅傷口好深，加上流血流得好勁，結果要搵嚟一個整容醫生先至搞得掂。據知情人士表示，朗尼今次受傷完全係佢自己攞嚟，話說佢喺上船時掛住同班朋友嬉戲，一個唔留神就差錯腳，結果咪衰咗囉。
馬捷達衰煲煙
朗尼自己都知衰，所以日前返英國時包到個頭密一密，戴帽之餘仲要着埋有帽衫，費時俾人見到咁樣衰。如果佢因為咁而缺席季初嘅比賽，費格遜就多得佢唔小，但奧雲就應該會掩住半邊嘴笑，事關咁佢就有機會落場。
至於返家鄉意大利度假嘅馬捷達，就冇學似師兄朗尼咁搞到有皮肉之苦，但弊在俾人影到煲煙呢，而且仲喺禮拜日見晒報，你話費格遜唔激到扯火就假。從佢揸煙嘅手勢睇嚟，加上係咁煙駁煙，我求大俠斷估呢個17歲o靚仔，唔會係啱啱先學識煲煙。
費格遜向來對旗下球員管教得好嚴，唔容許有人喺公眾地方煲煙，從而影響球會形象，聽講連煙癮好大嘅貝碧托夫都唔敢抗旨，最多都係匿埋食。馬捷達同朗尼一樣，都會喺今個禮拜返曼聯報到，到時佢肯定俾費格遜捉住「照肺」。