鞋王三奶李姿霆（Karen）與黃長發半年情玩完，但連日風雲再起，被指為黃長發契媽的Christine與契仔玩孖咇真人騷，Karen則爆舞王霍紹裘女友Sindy冧黃長發。昨日輪到黃長發開拖，與契媽、舞王及Sindy發聯合聲明圍攻Karen，契媽更自稱收到疑似三奶電話騷擾，Karen直斥他們人多恰人少，指黃長發「好似想我死」，契媽借錢唔還兼反咬一啖。
黃長發去年搭上年長16載的鞋王鄧劍群三奶李姿霆，半年孽戀於上月告終，回復單身但繼續無業的23歲黃長發卻不愁寂寞，連日與被指為契媽的劉嘉瑜（Christine）出雙入對，Karen日前接受本報訪問時更爆舞王霍紹裘女友莫秀芳（Sindy）冧黃長發，至昨日是非升級，Karen被長發拖馬圍攻，戰況慘烈。
長發：金錢瓜葛已解決
黃長發昨領軍插Karen，先由Christine借電台節目開路。商台主持查小欣昨開咪說：「Christine託朋友話畀我聽，話近日收到一個疑似三奶嘅電話騷擾，同埋呢幾日同黃長發嘅新聞，令Christine受影響，想問吓我有冇解決方法。」查小欣獻計發聲明，Christine照辦，遂於下午與長發、霍紹裘和Sindy發聯合聲明跟Karen劃清界線，雙方關係破裂。Christine在聲明上表示與長發屬好友，並無上契，「亦無介紹任何闊太予黃長發認識。」長發則謂與Karen分手因性格不合，與任何人無關，強調「金錢瓜葛亦已解決」。Sindy承認由Karen介紹認識長發，但Sindy說：「相識以來並無與他單獨見面，黃長發與李姿霆分手絕對與本人無任何關係。」霍紹裘就撐女友，信任其人格及深信有關她的報道是虛構。
Karen：人多蝦人少
Karen昨獲悉長發等發聲明一事，在電話中不禁說：「唔公平，冇良心，人多蝦人少！」是否以後連朋友都冇得做？她直言：「都可以咁講，好多周刊報道嘅嘢唔係出自我把口，當初分手係阿發身邊啲人同記者講，後來我澄清只係自我保護，冇對阿發反擊，唔想互數不是。」有指Sindy冧長發，Karen說：「我冇講過我哋之間有第三者，分手唔關人事，係之前有人講一啲說話挑撥離間導致分手，但我從來冇講過係邊個。」
提到Christine稱被疑似三奶電話騷擾，Karen即激動地說：「有冇搞錯！唔係呀？我都冇打電話畀佢，之前約Christine食晏俾人影咗相，之後都冇聯絡！」她越講越㷫：「有冇證據、有冇錄音吖？唔可以咁樣屈人，我使乜玩電話騷擾，我周身唔得閒呀！我用全家性命保證冇電話騷擾佢！一個電話都冇打過！如果有人覺得被電話騷擾，最好報警囉。」
「阿發好似想我死咁」
Karen續稱，長發胞兄長興因事借錢給Christine，後來他要求Christine還錢，她卻致電Karen相借，又答應每月分期還2,000元，但Christine一借冇回頭，Karen說：「我冇出過聲追，估唔到佢反咬我一啖，令我孤立無援。個個朋友錢銀嘅嘢就識搵我，冇利用價值就咁對我！我從來冇講過Christine一句唔好，仲代佢澄清同阿發嘅關係。」提起長發，Karen失望地說：「我自問咁耐以嚟冇數過阿發不是，到家我都話阿發唔係貪錢嘅男仔，但阿發從來冇喺人哋面前講過我一句好話，仲好似想我死咁。」
此外，霍紹裘昨提及發聲明一事時，在電話中說：「要講嘅都喺聲明講晒，嗰啲嘢唔關我哋事，Sindy同佢（Karen）係隔籬鄰舍，見佢冇朋友，全世界又唔睬佢，Sindy咪做好心幫佢收留佢囉。」
採訪：陳寶明
三面受敵
Karen當日與鞋王攤牌，至少還有長發在身邊扶持，分手後卻變得孤立無援，還慘遭三路人馬圍剿，形勢險峻。
《官司纏身》
鞋王：與Karen一刀兩斷，4月入稟高等法院追討對方的三個物業及售樓收益。
劉貝茜：上月入稟高等法院，控告Karen及黃長發放料對她構成誹謗，並申請禁制令及索償。
《父女反目》
Karen父：不滿女兒跟黃長發拍拖。
《聯手狙擊》
黃長發Christine、Sindy、霍紹裘：昨日發表聯名聲明，表明對抹黑他們的人保留法律權利，矛頭直指Karen。
資料來源：《蘋果》資料室
