社民連新星季詩傑喺鵝頸橋補選一役落敗後，連一段疑幻似真嘅戀情都冇埋，可憐成為雙失男人。八方講緊嘅唔係阿季同陳淑莊因選舉結下嘅霧水情緣，而係佢同創業板公司東光集團（8150）嘅短暫關係。盛傳喺阿季落選後，東光集團隨即唔使佢再做非執行董事。
八方問過治療緊情傷嘅阿季，佢話東光集團喺佢參選前一個月左右搵佢入去，但喺佢落選後冇耐，就已經因了解而分開。佢堅稱公司有新人入主，同佢想法未必相符，既然係咁無謂苦戀落去，最終自己提出分手，揮慧劍斬走短短一個月嘅關係。阿季話以後會專心服務鵝頸橋街坊，希望2011年開花結果，喺區議會選舉有着落。