MJ過身，好多吃80年代流行文化奶水長大嘅一輩人，特別感懷，但原來除咗樂迷之外，香港警隊入面都有唔少人懷念MJ，因為佢1987年訪港時，曾經去過尖沙嘴警署，同成班藍帽子一齊跑步影相。近日喺警察非官方討論區「警察俱樂部」度，一班夥計就忍唔住分享當年點滴。
有警察網民話，當時其實係舉行機動部隊解散儀式，遇上MJ到訪，原來佢好鍾意同紀律部隊交流。聽到巨星光臨，成間差館無論係報案室嘅差人定寫字樓嘅文職都起晒哄，紛紛同MJ影相。有個Sir仲話，當時MJ要求拍攝一大班PTU同佢一齊跑步，「老實講，只有鬼佬警司先夠膽即場答應。」咁又係，如果係今時今日，一定要問過PPRB，再同一哥開埋溝通大會先決定到啦。
佢哋仲記得，呢一段「喪跑」後來真係喺MJ嘅MV度出現過，至於張相入面嘅夥計，有啲人升咗做警司，有啲人就離開咗警隊，包括當年有「印巴雙煞」之稱嘅其中一煞PeterPannu。