浦和紅鑽前鋒高原直泰(圖)上屆霉到爆,喺日聯入得嗰6球咁大把,仲俾日本國家隊教練岡田武史踢走。今屆佢頹勢未止,踢咗3個月都仲係「零入球」,而且俾新仔原口元氣搶埋個正選位。當大家以為佢玩完之際,佢終於鹹魚翻生,喺對上5場日聯盃同埋日聯入咗5球,當中包括喺上周六聯賽入兩粒幫球隊作客贏山形山神3:2。查實呢位30歲球員射術好,加上踢過德甲漢堡同埋法蘭克福,大賽經驗豐富,如果佢真係可以重拾狀態,除咗有助紅鑽重奪聯賽錦標,自己亦隨時有望重返國家隊,出戰明年喺南非舉行嘅世盃決賽周㖭。