港台王牌節目《城市論壇》開播29年，一直係維園阿伯嘅朝聖地，每次佢哋都攞住大聲公喺場內場外叫囂。不過，強中自有強中手，維園阿伯噚日終遇勁敵，近期就六四問題語出驚人嘅金勞詹罕有出席《城市論壇》，就7.1遊行發表偉論，其間竟然因為不滿台上毓民同台下社民連紅衫軍打斷佢講嘢，唔理節目直播話走就走，表現同維園阿伯一樣咁自由奔放，成為《城市論壇》歷來首個中途離席嘅嘉賓。
寸7.6萬人唔算好多
照計就住7.1遊行呢個題目，好多人可以講，金勞詹做講者已經令唔少人意外，加上同場仲有一個大聲公黃毓民，好多人都等住睇兩位怒漢互片。節目一開始，佢哋嘅支持者已經各不相讓，維園阿伯猛鬧毓民，紅衫軍就狂噓金勞詹，搞到主持人謝志峰都要出聲，叫台下唔該忍吓口，唔好阻住嘉賓發言。
點知金勞詹一句7.6萬人上街相對700萬港人唔算好多嘅言論一出，即時引起台下紅衫軍爆發連環喝倒采。金勞詹聽到好勞氣，對住台下觀眾大叫：「唔准你哋喺度嘈！」到台下市民發言時，唔少紅衫軍衝住金勞詹而嚟，有人打譬喻話如果有個賊偷嘢，但只有幾個目擊證人，其他港人都睇唔到，佢係咪無罪吖？仲話金勞詹好似嗰個賊咁，言論極具挑釁性。
冇責任為政府講嘢
台上嘅金勞詹聽到後反而面不改容，話大家對數字各有演繹，互不相干。但到節目結束前10分鐘左右，當金勞詹想回應貧富懸殊問題時，毓民不斷打斷佢，加上台下經常有噓聲，金勞詹終於怒火中燒，自稱冇責任幫政府講嘢，既然大家玩對抗，最多離席抗議，說時遲那時快已經起身走人。
謝志峰見狀即時嗌住金勞詹，話畀時間佢發言，金勞詹一度折返，但原來唔係回心轉意，而係加多兩錢肉緊大鬧「我點解要喺度嘥時間？喺度浪費我精神？」然後大踏步走人。佢離席時唔少紅衫軍喝倒采，但金勞詹一於少理，仲遇到個着住件「戒賭」衫嘅Fan屎要同佢合照，似乎講賭先啱佢嘴形。