汽車股今年上半年可謂搶盡風頭，主要係受惠內地鼓勵民眾換車，推出「以舊換新」等相關優惠補貼政策，汽車股有好表現無可厚非。
過去半年，吉利汽車（175）、華晨（1114）、長城汽車（2333）及東風集團（489）等股價累積升幅唔細。但講到由3月低位展開升浪計，升得最勁之汽車股則係東風莫屬，該股3月初低位2.52元，6月股價最高曾見7.89元，累升213%。
上周五收6.68元，仍較3月低位升165%。難怪有散戶話，港股雖受金融海嘯陰影籠罩，但搵到隻汽車股投資，何懼金融海嘯！
申銀萬國日前發表報告，指東風6月份銷售情況比預期略好，預測東風09年全年銷量增長12.4%至118萬輛，預測09年淨利潤可達48.6億元人民幣。
跌破5.5元止蝕
睇番股價走勢，自6月初升見高位以來，東風以三角形整固，只要能守穩6.40元，後市仍可反覆再升，目標8.20元，失守5.50元止蝕。
方星俠