沙田陳太好多年前教過中學一年，做兼職老師，嗰間中學以目前嘅術語嚟講，屬band3學校，其實講係band5仲似多啲。當年佢見到班上有兩三個好學生，於是苦勸佢哋轉校，其中一位聽晒話，轉校成功，再考入中大。
眨眼間，呢位學生E已成為一間私募基金公司嘅首席執行官，即係CEO。學生E念念不忘老師當年指導轉校之恩，此日搵到沙田陳太，請佢到中國會樓下之一間意大利菜館吃午飯，原來此餐廳只限會員入內，高官孫明揚、名人張震遠、梁伯韜等等在座，沙田陳太話：「呢間餐廳價錢唔平，但幾好食。」
教書人往往有一個好大嘅滿足感，就係見到學生成材，叻過自己。所謂青出於藍是也。譬如一位band2中文中學數學老師有一位學生L，學生L鍾意數學，一路苦讀，攞到博士學位，成為中文大學數學教授，又以校友身份返回母校嘅校董會做校董（俗稱，正確講法係學校管理委員會或校管會），你話佢嘅數學老師係幾咁高興呢。沙田陳太只係教過一年中學，而且係兼職嘅，點知就有幾位學生周時問候佢，一位係女會計師，美國稅務專家，住在三藩市灣區；另一位就係學生E，故此陳太話嗰一年嘅兼職教師生涯有好大回報。
公子L就話永遠記得佢位校長，敬畏三分。唔講唔知，公子L，馬主N，律師W等原來係中學校友，威水師兄弟妹多到數唔晒，佢哋間學校叫做聖保羅男女。公子L話由小學部小六升中一之前，校長羅怡基要逐個召見。公子L話一個人行入禮堂，內裏只有一位西婦坐響度，已經驚一驚，不知所措，行埋啲，知道係羅校長本人，更加腳仔軟，唔識講嘢咁滯，幸好見一見就准佢升班。羅怡基校長當然大名鼎鼎，家族顯赫，半山有條KotewallRoad，就係以佢哋家族為名。馬主N補充話，前有報道講洪承禧係何東外曾孫，應該係錯嘅，據佢所知，洪承禧係羅怡基校長嘅親戚至真。洪承禧入獄，令不少馬圈中人無限慨嘆，幾乎不敢相信，有一兩位遴選委員更加話，以後若非至愛親朋，一定唔會推薦入馬會！