葉翠翠（左）同周家蔚噚日喺九龍公園出席「香港國際手球錦標賽」活動，佢哋同其他人比賽10分鐘，雖然只係玩票性質，不過佢哋都好認真。曾被指整容嘅翠翠擔心食波餅，佢話：「嚟到現場至知要落場玩，從來未玩過手球，所以都好擔心，最驚就係俾個波打到塊面。」周家蔚話曾經俾表哥用波打中塊面，佢話諗起都驚，所以佢唔多鍾意打波喎！