曾於01年贏得常規賽MVP、並帶領76人殺入總決賽僅負湖人嘅艾華遜（AI、圖），相信係唔少球迷心目中嘅偶像。雖然AI已經34歲，上季喺活塞又不甚愉快，但佢始終係聯盟數一數二嘅得分好手。眼見前隊友華萊士蹺埋手唔憂嫁，連塞軍3巨頭同教練都一齊上門游說佢，反觀對自己有興趣嘅講嚟講去都係山貓灰熊之流，都咪話唔灰。近日難得熱火總裁萊利親自邀請佢加盟，不過第一句就話因為球隊薪金到上限，所以用唔到約550萬美元（約4,300萬港元）嘅「中產條款」（midlevelexception）羅致佢，只可出約200萬美元嘅「老將條款」（veteran'sexception）。「戰神」都俾人㩒價，真係世界難撈。