無綫重頭劇《烈火雄心3》今晚有得睇，噚日劇中演員黃宗澤（Bosco）、胡杏兒、鄭嘉穎同王喜等一齊去荃灣宣傳同介紹劇情，點知監製王心慰唔覺意踢爆黃宗澤同胡杏兒拍拖，笑到現場個個肚痛。
當時監製喺台上講解黃宗澤（Bosco）同陳茵媺嘅感情線，點知佢一時口快講錯做胡杏兒，台上其他演員即時笑到失聲，Bosco就尷尬陪笑，點知監製仲加多一句：「唉呀，講咗現實嗰對㖭！」
王喜突然落淚
又有緋聞聽，又有宣傳片睇，點知最後關頭仲有人喊。話說王喜喺台上話今次會係自己拍嘅最後一套《烈火》，佢話：「希望觀眾會鍾意，因為宣傳片入面嘅鏡頭都只係冰山一角，三部之中呢部人物關係同場面都去到沸點。」後來佢落台，同監製傾傾吓，點知王喜突然喊到收唔到聲，原來佢因為唔捨得告別《烈火》，所以一時感觸落淚啫！