好多朋友都好疑惑大姨媽我明明住喺香港區，點解成日喺九龍區跑，成日過海唔煩咩？唔好意思，唔記得話畀大家知，我娘家喺九龍塘，好多由細玩到大嘅老友都集中喺附近，況且香港地揸車去邊都容易，有幾煩呀！「點都要搵地方泊車㗎？」係！如果撞啱出動嘅老友太多，娘家唔夠車位泊嘅話，我哋就會將車泊喺又一村附近嘅咪錶位，除咗夠方便，仲泊得好開心，因為夠平囉，家香港仲有幾多地方嘅咪錶仲係兩蚊半個鐘呀？幾隻手指都數得晒喇！世姪女問我怕唔怕篇車誌登出嚟之後，啲人會一窩蜂揸去泊車，搞到我哋無位喎？坦白講，我個人就好大方嘅，有好嘢梗要介紹畀大家，等大家去開附近想平啲泊車都知窿路，又或者知多樣嘢都無妨嘛，係咪？而且，都係睇吓邊個搵到位啫，更何況，唔係去開嗰頭都唔會專登揸部車去泊位，再花廿幾蚊打的、又或者行餐死出番去又一城又或者太子啩？若然真係咁有「誠意」咪由得大家囉！
文：大姨媽