唱得又作得的側田前晚擔任新節目《超級巨聲》評判，過程中他大晒英文，又手勢多多，被主持劉美君和昔日跟他稱兄道弟的古巨基狂寸狂玩，基仔更踢爆側田狂冧其中一名美少女參賽者，搞到側田又瘀又，最後更發晦氣叫傳媒不要擺他上枱。
無綫新節目《超級巨聲》前晚在將軍澳電視廣播城錄影，當晚有24名參賽者出戰，呂方、古巨基、側田、藍奕邦和音樂人伍樂城擔任評判。當晚不少參賽者均有來頭，包括新秀海俊傑的弟弟海俊文、曾參加全球華人新秀歌唱大賽並打入8強的蔡俊暉，又有01年全球華人新秀歌唱大賽香港區選拔賽金咪大獎得主何晶晶。
承認有初戀感覺
側田當晚充當評判，除了大晒高音和低音等英文詞語外，又不停叫「pass」，不過發音特別，再加上手勢多多，果然夠晒搶鏡，但卻被主持劉美君、呂方和昔日好兄弟古巨基狂玩，他們不時扮側田的手勢和講英文的腔調，當年僅16歲的何雁詩出場唱一曲《OnMyOwn》時，基仔更踢爆側田冧這名美少女。
劉美君率先踢爆何雁詩是側田的心水之一，側田聞言說：「好叻女，令我有puppylove感覺。」劉美君笑問側田是否喜歡她？基仔聞言搶着說：「我可以證明，噚晚食飯阿田都有提起佢。」側田神色尷尬死撐說：「我做佢老竇都得。」基仔竟欲罷不能，並笑說：「我有提議，叫側田攬吓佢。」側田拒絕，並謂若她勝出才攬她一下。
發晦氣拂袖而去
當晚側田的女fans朱子媚也有出賽，雖然側田力撐，劉美君卻毫不畀面說：「Fans都冇用，冇分加不特止，仲要扣分，我哋唔要靠關係。」事後問側田會否覺得被玩，他起初笑說：「我最細，呢啲都慣咗，佢哋講笑，唔好標題。基仔大哥，美君姐姐，我冇佢哋辦法。」記者指因側田經常講英文，要劉美君充當繙譯，側田聞言發晦氣說：「唔好搞是非，大家專注喺參賽者度，唔好咁留意我。」說畢便匆匆離去。
另外，當晚不少參賽者都使出喊功向評判求情入圍，結果不少成功闖進下一環比賽，而劉美君在台上談到年紀時不慎衝口而出說：「我一定大過你，我小邊個都得。」她自知失言立即道歉。呂方表示不少參賽者水準很高，卻大彈節目氣氛平淡，不夠刺激。
採訪：何慧斯
攝影：林德雄