民政事務局嘅德成局長噚日發表咗篇題為〈君子愛財取之有道〉嘅《局長隨筆》，佢話雖然香港人開口埋口都講個錢字，但唔接受凡事利字當頭，仲引用司馬遷嘅說話，形容不義之財發達者係「奸富」。
八方初時以為局長想暗寸煲呔早排嘅六四扮代表論見利忘義，但諗落以佢嘅政治立場，又點敢話大陸發緊嘅係不義之財？睇落去先知，局長係講城中熱話嘅爭產官司，話有人喺網上虛擬一個小朋友給父親的信，感謝父親同阿媽結婚十日後，同一個有錢老女人發展婚外情，自此一家人就過住幸福生活，暗諷官司反映扭曲嘅價值觀同人性。
德成局長話，由網民嘅創作睇到，香港人好利而重義，愛財而有底線，唔接受見利忘義、貪財負義嘅所為。其實，八方想話，局長你去一趟六四燭光集會，就乜都感受到啦。