卡卡上星期二正式加盟皇馬，有成5萬球迷去巴拿比奴球場歡迎佢，但未算威，事關前曼城球員華素爾上星期五，同喺上屆土甲排第13位（18隊）嘅小型球會安卡拉高古傾加盟事宜，竟然有成3千球迷去接佢機，唔知仲以為係卡卡或者C朗嚟咗。一個英超棄將居然有皇帝級嘅待遇，問你服未！
剛被曼城鏟走
曼城今屆大搞，簽咗巴利同辛達告魯斯等球星，所以亦喺前幾日清咁啲瘀血，宣佈唔要米斯、夏文、米高波爾同埋華素爾。米斯同米高波爾未有着落，夏文據聞有機會加盟侯城，至於華素爾喺經理人搭路之下，決定去土耳其闖闖。上星期五佢飛去土耳其，同土甲球會安卡拉高古傾條件，一落機就嚇佢一跳，事關喺安隊主席辛茲斯爾迪林安排之下，有成3,000球迷到場接機，其中有球迷高舉寫有佢個名嘅橫額同紙板，而且仲有一班靚女球迷着住印有佢個名（VASSELL）同號碼（12）嘅安卡拉高古波衫，直頭當正佢經已加盟。
300部車追「星」
出到機場，球迷行為仲誇張，有成50部巴士同埋250部私家車，跟住華素爾部車返酒店。唔係我求大俠睇小華素爾，相信佢喺英格蘭踢咁多年波，肯定未試過遇到咁嘅情況，真係發夢至有。辛茲斯爾迪林說：「等華素爾參觀完我哋嘅城市同球會後，希望佢會有決定。今季我哋嘅目標係簽到出名球員，以慶祝創會一百周年，但願他成為我哋一分子啦。」
現年29歲嘅華素爾喺英超肯定唔算係乜大牌，但話晒佢喺英超打滾12年，踢咗265場同埋入咗52球；加上係前英格蘭國腳，仲喺04年歐國盃外圍賽主場贏土耳其2:0一仗中入咗1球，所以對安卡拉高古球迷嚟講，唔陌生。聽講佢同安卡拉高古已傾得七七八八，好有機會會加盟，到時佢打正旗號做「土」皇帝，肯定唔少得有大班女美同埋工人服侍。
知多啲
安卡拉高古（Ankaragucu）喺1910年成立，位處土耳其首都安卡拉，但喺土甲聯嘅成績欠奉，只係喺1949年贏過1次冠軍。上屆佢哋喺聯賽得第13名，排倒數第6，成績認真麻麻，而冠軍是比錫達斯。