左派新世紀論壇旗下新青年論壇調查上半年局長、副局、政助見報率，噚日公佈結果，發現環境局官員見報率最低，局長邱騰華有881篇報道，副局長潘潔有104篇，兩者相差7.8倍；政治助理則全部隱形，見報率通通唔夠一個巴仙，教育局政助楊哲安有52篇已算最紅，發展局張文韜只得15篇，奀過奀星。
調查見報率有乜用呢？新青年論壇幹事王翠蘭話低見報率反映副局政助辦事不力，因為佢哋有責任協助局長推銷政策，如果有做好份工，應該頻頻見報。
僅以見報率衡量副局政助有冇做嘢，若非toosimple，就係naive，八方相信佢哋冇統計新論壇過去半年見報率，結果可能仲醜怪，如此獻世，新論壇、新青年論壇冇份做副局政助，係有原因嘅。