呢排跟團返大陸玩都好有危機感，一個唔好彩同機有豬流感確診病人，無辜辜被隔離七日，旅行變咗坐監，買咗隔離保險有得賠都冇癮啦。台灣就冇呢啲「株連」安排，吸引咗唔少港人轉軚改到台灣玩。
香港分配350名額
小妹早幾日同台灣觀光協會香港辦事處主任王春寶傾開偈，佢話協會又有新嘢搞，即日起推出第三季「楓采秋韻」優惠活動，家嚟台灣玩嘅遊客，憑機票或報團證明，到協會中環辦事處，即可獲贈台灣名特產伴手禮兌換券等優惠。但講到最大堆頭，就係下月18日喺台南安平古堡筵開100席嘅「來台灣呷美食」台灣傳統辦桌活動。會免費宴請來自全球1,000名旅行團觀光客，香港獲分配350個名額，佔總數三分一。
所謂辦桌，就好似新界圍村舉辦嘅到會盆菜；王春寶話，之前熱賣電影《海角七號》，其中有一幕講男女主角喺廟會參加辦桌活動。今次台南安平古堡嘅辦桌共有十道菜，計有佛跳牆、蘆筍炒干貝，同埋台南地道小吃紅蟳米糕等。現場仲有布袋戲、歌仔戲睇，同埋糖葫蘆、揑麪人、龍鬚糖、打陀螺等民俗活動攤位。係港人體驗台灣傳統美食同活動嘅好機會。有興趣嘅香港朋友，可以透過旅行團報名，先到先得。查詢可致電25810933。
電郵：mailto:[email protected]