7.1遊行係泛民籌款盛事，粗略估計金額以百萬元計，周三晚民陣、職工盟同社民連遊行後點算款項，有意外驚喜，竟然發現自己個錢箱內各有一個利是封，內有一張五萬元支票。何方神聖共捐出15萬元大利是畀泛民呢？
三張支票只寫上銀碼，一律冇寫抬頭，過數日分別係本月21日或22日。據講社民連主席毓民一睇就直指係流嘢，指示職員唔好去銀行入數，不過民陣卻認為天降橫財唔好嘥，職工盟則問清楚其他泛民團體有冇收到支票後才定奪。
印刷商失支票簿
支票屬於一間位於葵涌嘅印刷公司，八方噚日搵到負責人葉小姐，佢話公司有時會做善事，但冇捐錢畀政黨，泛民收到嘅三張支票，肯定唔係公司開嘅，「張票一定要有公司印先可以過數，所以我哋冇損失。」
葉小姐話，早前向銀行申請新支票簿，但一直未收到，不排除有人盜取後冒名開支票戲弄泛民，佢會通知銀行並考慮報警。
三個團體中空寶成為泛民中人趣談，大家議論紛紛是誰玩呢三個團體呢？