人力資源與培訓專家Ｒ，根據平時嘅英語培訓工作坊教材，篩選成書，出版英語自學手冊，以實用英語對話為主，對象係飲食及零售前線人員。佢特別打電話嚟邀請左丁山過海到書局出席新書發佈會。於是坐地鐵到尖沙咀，出到嚟就碰到一位籃球高手Ｄ，與佢講起當日之姚明新聞，大家一齊嘆息。姚明據聞因腳傷嚴重，下季或者不能復出NBA，甚至會被逼退休㖭。籃球Ｄ與左丁山一致認為姚明係十三億人之中唯一一個有資格在NBA稱王稱霸嘅中鋒，體型特高，投射準繩，傳球有水準，唯一可彈之處就係唔夠勇悍，喺衝撞方面吃虧。
籃球Ｄ話：「中國人體質先天不及黑人，後天中國式訓練亦不夠硬，肌肉力量不足。試比較吓侯活與姚明之手臂，便知邊個手瓜硬。姚明去到NBA已有好大進步，但打中鋒嘅體力要求特高，一季打八十二場常規賽，要趕飛機，要練習，對球員非常吃力。前幾年姚明仲要不斷為國家隊出征，去年勉力打奧運，體力一早透支，中國頂級體育人才少，每有一個，就給國家拼命用到盡，用到殘為止，姚明如此，劉翔如此，過往楊傳廣亦如此，幾令人傷感。」
如果姚明就此退出籃壇，球迷實在傷心，希望唔好啦。入到書局，見到退休高官，講起警察薪酬是否有後着，高官話據佢所知，警察要求有獨立薪酬調整機制，已有幾年歷史，由李一哥傾到鄧一哥，一直如此，但政府反應慢，而警方高層亦有存疑，故此一路拖，拖到爆煲而已。點解警方內部有人不同意獨立薪酬機制呢？退休高官話：「一來知道獨立機制會帶來麻煩，令其他公僕不滿，二來獨立機制未必一定着數，譬如用甚麼指標嚟決定加薪或減薪呢？講治安情況呀？講破案率呀？講工作量呀？危險程度？以倫敦、紐約、LA、北京、東京作比較？諗吓都知道不容易，如果睇住其他公僕加薪而警察凍薪或減薪，到時又點？」咁講法，鄧一哥拍心口同政府傾，細節上藏有好多魔鬼，人總係想加薪不想減薪嘅，警察或有道理，但要求過高嘅話，社會會有反彈。