據內地傳媒報道，中石油（857）母公司中國石油天然氣集團與BP聯合投得伊拉克魯邁拉油田。中國石油集團向外採購油田，無論站在企業或國家立場睇都係一件好事，而且油田位置仲要在伊拉克呢處美國「地頭」拿到，份外令人矚目！
不過再睇落去，先知伊拉克開出的條件十分苛刻。伊拉克石油部對外國石油公司主要通過採取支付超額生產報酬的方式進行合作，而其為數個油田提出的超額生產報酬，最高只有每桶2美元！不過，內地輿論普遍認為呢一個係把握伊拉克石油動向之機遇，所以睇法好正面。
其實中國石油集團年內動作多多，莫講係美軍打番來的伊拉克，幾乎邊度有石油該公司都想去，近日亦同烏茲別克國家油氣公司簽署多項協議，進一步建立能源合作關係，合資開發烏國北部之明格布拉克油田。
此外，中石油亦有動作，計劃投資蘇格蘭煉油廠，以及入股新日本石油之大阪煉油廠。
睇番中石油股價走勢都算與大市升跌韻律同步，由3月份低位5.04元見底以後，一直升至6月中高位9.59元，累升90%；之後股價回吐至50日線水平反彈，不過幾度升至20日線約8.80元左右就無力再上，反映高位有沽壓。除非短線油價突然大幅急升，否則中石油後市調整之勢難改，初步睇7.80元至8元水平應有較強支持，可伺機待回吐低吸作中線投資，目標10.50元，以7元止蝕。
方星俠