陳志雲噚日唔訪問人，反而做人哋節目嘅嘉賓，佢去咗銅鑼灣上無綫飲食節目《咁至識食》大嘆美食，畀主持莫樹錦醫生訪問番轉頭。陳總大讚莫醫生表現一流，又話做節目咁耐今次就最舒服，因為唔使問問題，點知轉頭又追問莫醫生點解唔結婚喎。
相約見面
馮仁昭就照辦煮碗問陳總點解仲係孤家寡人，佢話自己成50歲，結唔結婚都冇所謂。陳總又自爆近日有女士追求自己，但唔係開心，係覺得好驚喎，佢話：「呢個女士行為怪誕，sms之外仲有e-mail，咁都唔止，佢仲相約見面，但我就唔肯定呢位女士係邊個。」原來呢位女士前幾年已經有行動，但近日追求行動變本加厲。
陳總話幾日前呢個神秘女士送咗個pizza去寫字樓畀佢，仲留字話自己都喺地球某地方食緊一樣嘅嘢，陳總當然唔敢食呢個批啦，仲原個退番畀間餐廳。聽講呢位「癡女」成日喺街度流連，希望見到陳總一面。不過今次就真係神女有心，襄王無夢喇，因為陳總話唔只驚咁簡單，仲覺得好似俾人滋擾咁，仲話就嚟要請保鑣㖭。