向來對感情事三緘其口嘅八九學運領袖王丹，最近喺facebook披露佢原來仲係單身！八方之前喺FB同「毋忘六四」做咗朋友，呢位猛料朋友噚日喺近況一欄宣佈：「一個好消息同埋一個好消息」，第一個係佢朋友人數突破35,000人，第二就係請咗王丹做呢個account嘅管理員。
噚日開始，八方同其他人陸續收到王丹個人賬號嘅friendrequest，click入王丹個profile睇，學生時代戴住副鞋底咁厚嘅膠框眼鏡、沉實內斂嘅佢擺咗幾張好stylish嘅黑白照上去，自言係詩人嘅佢，喺profile度話自己係「一個不可救藥的理想主義者，致力於做一個溫和、堅定、建設性的政治反對派」。
網民最最最重大發現，係佢喺relationship一欄填咗自己係single（單身）喎！究竟王丹今次係百密一疏，定係刻意透露自己係鑽石王老五呢？丹丹粉絲點睇？