Samsung（三星）嘅旗艦LEDiDTV8000系列啱啱運到香港，小藍第一時間去試吓部頂級機王，搭去到佢哋36樓嘅Showroom，一打開門就放咗部55吋LEDiDTV機王UA55B8000XMXRD，好鬼搶眼。Samsung消費電子產品巿務部高級經理Alex笑笑口話，部機啱啱上場，梗係要對正大門口啦。
高對比度兼慳電
Alex話，呢部機同其他型號LEDiDTV一樣，用咗LED影像系統，達到超高嘅對比度，畫面黑位夠黑，冇過去LCD咁有浮灰，兼且慳電近半，即使係內置咗數碼廣播接收器，機身厚度只有29.9毫米。而呢部機王獨有特色係用咗200Hz流暢倍增技術，一般薄屏電視機只係得50Hz咋，即係話睇一啲動態畫面嗰陣，唔會有窒格同拖尾嘅情況。
講就天下無敵，即場試機先實際。Alex先播一齣Blu-ray版《殺神特工》（Wanted），啲飛車追逐、子彈橫飛畫面勁流暢；另一齣新鮮熱辣嘅《冰河世紀3》（IceAge3）demo片，畫面色彩層次分明，樹獺森仔啲毛髮好細緻。買番部擺屋企睇，真係戲院都唔使去。
講到價錢喇喎，其實一啲都唔平，定價49,880元。小藍買唔起，但都走去旺角格吓價，新機最平賣到41,300元，劈價17%，有興趣不妨行多兩步。