鞋王三奶Karen（李姿霆）與黃長發一段不倫戀告終，但好戲在後頭，Karen人財兩失，男方卻被指冧掂兩中女，包括契媽Christine（劉嘉瑜）及舞王霍紹裘女友Sindy（莫秀芳）做新靠山，衣食無憂。昨日Karen接受本報電話專訪，力證Christine非第三者，但指Sindy處心積慮介入戀情。Karen又大爆發仔在facebook上400多個朋友大多是女性，也因而結識契媽。分手剛一個月的發仔已另覓新歡，辜負了自認要真愛唔要錢的Karen，難怪她說：「我幾千萬買咗個教訓！」
K：Karen 記：記者
記：係咪契媽Christine同Sindy嘅介入令你哋分手？
K：唔係契媽，Christine係我朋友，周刊寫我講話有人乘虛而入，嗰個唔係契媽，大家以為我講佢，我哋分手都唔關人事，只係有啲人阻止我哋拍拖，想用啲說話拆散我哋。
記：咁契媽同發仔有乜嘢特別關係？
K：據我所知係冇嘅，我同佢拍拖嘅時候發仔同我講過Christine好鍾意佢，不過只係錫佢啫，發仔係成日去契媽屋企，不過唔係報道咁講半夜上去，我都去過佢屋企。
好友介入 力撬發仔
記：咁發仔同Sindy係咪關係好好？
K：Sindy好錫發仔，Christine話過畀我知，Sindy好鍾意發仔，仲話如果一齊出街最好唔好叫我去，不過如果只有發仔出嚟佢就去喎。我同Sindy係朋友，我唔明點解佢咁，發仔係我介紹畀Sindy識，我只可以講想拆散我哋嘅人唔係Christine，我同Sindy兩個月冇見，我睇清楚啲朋友，佢仲同發仔講我嘅背景好複雜，家我哋分咗手，咁咪好囉，有人可以成日見發仔。
記：Sindy對發仔咁好，佢嘅男朋友霍紹裘唔知咩？
K：佢（霍紹裘）唔會介意，佢自己都好多女朋友。
記：你覺得發仔係咪負心漢？
K：佢話咗冇朋友做啦，好絕囉。
記：有冇恨過佢？
K：我唔恨佢，只係佢處理手法唔好，同埋係我自己衰蠢，我同鞋王一齊真係唔開心，為咗個女我先同佢一齊，我唔要錢都要真愛，發仔係好真，不過佢唔定性，又冇經歷。
記：咁你家咪人財兩失？
K：冇法啦，係呀，仲搞到全港臭晒㖭，當我知道鞋王有二奶之後，我同自己講我搵到第二個就走，我要真愛唔要錢，如果我恨錢就呃住鞋王、瞞住佢同發仔一齊，要玩感情嘅話我唔會肯公開認，我貪錢就唔會咁儍。我年薪200萬，一年買到100萬首飾。我個女本來有1,500萬基金，佢16歲就可以動用，家cut咗。我幾千萬買咗個教訓，啲官司都未搞掂，我係想畀發仔一個名份，我唔想玩偷情先公開，如果唔係我仲可以繼續過闊太生活，不過我唔明發仔反過來話我呃佢。
記：發仔話識你嗰陣，唔知你有個女同男人喎？
K：我初識佢時有同佢講過我有個女，佢聽咗係呆咗一呆，不過好快就話唔介意，佢問我有冇男友同老公，咁我係冇男友同老公，我又冇結婚。
記：你係咪畀過錢發仔用？
K：係，唔係好多錢，我幫佢畀過兩次卡數，幾萬蚊啦。我唔會問佢攞番啲錢，因為我係出心畀佢，不過發仔同人講話我用錢綁住佢，發仔唔係貪錢嘅人。
記：你有冇覺得自己睇錯人？
K：我唔敢講，發仔同我一齊唔係為錢，我知佢同朋友講過，同我一齊之後佢自己好臭好衰，因為啲報道寫得佢唔好。我家專心搞官司件事先，都用咗唔少錢，不過經濟上我支持到。
愛上醋埕 日發萬誓
記：發仔話你係大醋埕，唔畀佢識女仔？
K：我唔知佢點解反過嚟講，因為發仔好易呷醋，我個facebook只有佢同Christine，佢自己個facebook就有400幾人，大部份仲係女仔，Christine都係喺facebook識番嚟。有一次我哋去豐澤買嘢，有個男sales嚟問我睇乜嘢，我都冇望佢，話我自己睇就得喇，點知行出門口發仔即刻發難，佢好惡話我好電個sales，仲要我發誓話冇望過佢，咁其實我真係冇望過佢，我一日發成萬幾次誓，佢先係超級醋埕。我哋成日為呢啲嘢嗌交，但係佢同人講話我電佢啲朋友，俾人覺得我好似潘金蓮咁，佢話我成日望住個朋友電佢，嗰個人係gay㗎，佢唔畀我睇男醫生，又唔畀我搵男律師打官司，連我去睇陳冠希啲戲佢都嬲，咁我睇吓唔會嫁咗畀佢㗎。
搭上花o靚 母罵肉酸
記：咁你仲愛唔愛佢？
K：我愛佢都冇用，佢已經好絕話朋友都冇得做，佢仲後生，得23歲，條件又咁好，我都就快40歲，仲有個女。佢有排做人，仲要立足，我唔想佢衰，佢唔識陪我行埋呢條路，其實我同佢都慘，明明好好咁拍拖，我畀阿媽鬧我好肉酸，為咗個死仔包搞成咁。
記：你公開戀情之後，同鞋王斷絕關係，又畀錢幫佢還卡數，最後都分埋手，係咪覺得為佢犧牲好大？
K：我預過下半世同佢一齊，不過我同佢講，如果有更好嘅女仔我會放佢走，我到時人老珠黃，唔好咁自私。
記：鞋王之前話你番轉頭都嫌丟臉？
K：我都冇諗過番轉頭，因為我咁大犧牲，就係唔想再做三奶，做三奶我先自己丟臉。
昨日下午4時半，Karen獨個兒到九龍塘又一城逛街，她先到一間童裝店選購兒童便服，在店員熱情招待下，她買了兩大袋童裝，接着她又到玩具反斗城，買了兩大盒玩具給女兒，她行經一間家具店入內細看一些餐具，但卻未有幫襯。昨日記者致電給契媽Christine，她甫聽見是記者即說：「Ihavenothingtosay.」隨即掛線。霍紹裘則在電話中說：「我冇嘢講，拜拜！」
採訪、攝影：陳寶明、黃偉雄、黃文偉
資料庫：長發媾女七國咁亂
鞋王鄧劍群妻妾成群，其三奶Karen（李姿霆）又另結新歡黃長發，黃長發飛起Karen，盛傳一拖二搵到新中女靠山，真真假假七國咁亂關係表越寫越多，關係複雜。
資料來源：《蘋果》資料室
