年初新界王發叔在車公廟求得下籤話香港「內有家鬼」，八方聽聞行政署近日真係出動緝拿內鬼，在政府總部搵奸細！
行政署咁緊張，皆因綠色和平幾個成員，上個月23號進入中區政府合署（CGO）西座天台，遊繩而下喺大廈外牆懸掛一幅巨型橫額，批評煲呔漠視溫室氣體排放問題，係導致氣候失常嘅逃犯；雖然幾個示威者事後通通被捕而且被檢控，但政府總部係機關重地，輕易被人進入，暴露嚴重保安漏洞。
訪客要詳細登記
行政署知衰，即時收緊保安措施，以前事事旦旦登記就放行，家陣訪客要填報詳盡資料才可入內。
小道消息稱，示威當日有人以開會為由進入CGO，所以行政署思疑政府總部有內鬼，而且如此一場大龍鳳不是一般街頭示威抗議，不排除有人事前多次踩線，視察環境了解現場情況後，詳細部署方成大事。咁多準備工夫，若非有人裏應外合，外人豈可輕易入內搞搞震？
為了揪出「幕後黑手」，八方聽聞行政署近日搵人向在CGO工作人士打聽，希望找到蛛絲馬迹令內鬼現形，在CGO設有辦事處嘅議員，同埋佢哋嘅職員亦成為目標。有人話如果今次捉鬼大行動無功而還，最唔安樂嘅應該係行政署長麥綺明，事關今次掛橫額事件，凸顯CGO豆腐渣保安問題，呢隻鑊麥綺明恐怕孭硬。
麥綺明驚再孭鑊
麥綺明早兩個月剛剛升正D6，當然唔想孭完一鑊又一鑊，為免重蹈覆轍，行政署寧枉無縱落閘絕不手軟，結果搞出7.1晚上封鎖CGO風波，當晚有個幾兩個鐘頭所有人等一律不得出入，泛民議員遊行後想返回辦公室被阻，職員想放工離開亦冇得走人。據知泛民噚日飯盒會達成共識，要求立法會行政管理委員會跟進呢單疑似非法禁錮事件，麥綺明要畀個說法，否則政府可以隨時剝奪議員行動自由，仲得了？
有人幫行政署解畫，指當晚有百幾二百人在政府總部外聚集，群情洶湧，保安人員加強防範無可厚非，一旦示威者反轉整個政府都似，有乜嘢後果，難以想像。
mailto:[email protected]