「我嘅目標就係走勻呢度每個角落，走出自己嘅路，嚟緊你會成日見到我個嘜頭㗎啦。」扭開now100台，壯志雄心自信滿滿伶牙俐齒說出這席話的年輕人，叫洪永城。26歲仔走勻30個國家，足迹踏遍三大洲，主持旅遊節目《一個地球》破格出擊，玩全球網交搵隱世導遊、全裸攬女介紹畢加索名作、爆粗推介阿根廷牛扒，未算勁，要2012太空漫遊「升呢」。Y世代backpacker狂派再起，嘩！嘩！嘩！打到嚟！ 撰文：朱倬誼
洪永城（Tony）現任now100台旅遊節目《一個地球》主持，一條友孭背囊帶你穿州過省，遊歷各國特色景點，全程感覺勝在夠young又直接，住hostel吃街邊檔，玩得夠地道。在早前播出的阿根廷特輯中，Tony在小保加主場睇球賽嗌餐死；客串放狗員力敵8巨犬；在餐廳嘆盛名牛扒辣親手，即場爆粗呱呱叫。其任意率性，我行我素，完全擺脫了傳統旅遊節目框框。
男女肉蟲 介紹名畫
近日出街的西班牙特輯更誇，為解構畢加索裸體抽象畫，Tony居然做全港首位全裸出鏡的旅遊主持，與裸女爆房肉帛相見。重提全裸，他不知多回味：「嗰次去畢加索博物館，導演睇啲畫，『點解全部都裸嘅？Tony，不如你都裸。』『黐線！』『opening將啲畫嘅畫面blur（模糊化）咗，套落你真人度呀。』諗吓又幾得意喎，後來我哋喺當地book咗間酒店房，四條友連埋兩個西班牙女仔玩6P咁上去。我哋扮畫入面嘅動作，譬如個公仔摸女人胸，我就摸住囉，姿勢叠埋一齊，女仔係模特兒唔尷尬，我就有少少，嗰個位置要貼膠紙封住，驚有任何反應就唔好啦，拍完要剪毛先搣到膠布呀。」全裸終身難忘，但開眼界則是火節，他一人分飾遊客及着傳統服扮自己友置身華倫西亞巡遊，萬人堆中觀火祭，以雙線角度包裝題材，別樹一幟。
《一個地球》開創背囊友新路，有賴一班台前幕後年輕人熱血炮製，Tony說：「我哋嘅導演、writer、攝影師都比較young，TVB有贊助商總要去啲景點嗌好靚，呢個係傳統。我哋冇贊助商束縛，會貼潮流，近觀眾，公司知我一向走backpacker路線，係做自然啲嘅感覺。每次出trip大家一齊brainstorming，我會係facebookadd人、睇人哋嘅blog，同當地人講我哋會嚟拍嘢，請人帶我哋出去玩，大部份都成功，然後喺每次旅行途中發掘事物，咁先夠地道。」
網交異性 有頭冇尾
講到網交對象，Tony直認女多於男，但真人見面後有冇下文，他笑說：「咁短時間好難發展，除非一次半次性慾咁啦，但邊有時間？帶佢去邊呀？唔通『導演！唔該出出去先，我帶咗個女仔返嚟』，梗係唔得啦！只係喺facebookkeep住friend囉。」
攝影：陳順禎
場地：Olala
成也君如敗也君如
洪永城一如旅遊小百科般閱歷豐富，但他卻自認膚淺及cheap，愛吃台灣西門町攤檔的烤腸；愛澳洲塔斯曼尼亞的日落、生蠔、湖水；愛尼泊爾加德滿都的人民純樸友善；愛布達佩斯靚女多；憎斯里蘭卡冇性格，但沒想到，成也君如敗也君如。
Tony做到旅遊達人原來與吳君如有關，他說：「有次同吳君如、鄒凱光去布達佩斯拍嘢，當時自己年資淺，唔識講嘢又怕醜，我哋三個人對答傾偈，自己就好似花瓶，講嘢唔係好夾，佢講嘢我又接唔到，覺得自己冇乜用，導演、writer又唔幫手，好唔開心，覺得自己仲適唔適合做主持呢？自我評價好低。」後來自尊歸位又關君如事，兩人合作拍泰國潑水節泯恩仇，「今次淨係我同佢，又有writer幫手，可能自己識講嘢咗，夾出嚟幾好，先挽回少少自信心咋。」
人物誌：憎刻板工作決外闖
現年26歲的洪永城（Tony），10歲到新西蘭讀書，後嫌生活沉悶，01年回流報讀港大專業進修學院市場推廣文憑課程，但又嫌悶，貌似崔建邦及吳大維的他04年加入有線，擔任綜藝節目《活得很滋味》旅遊主持，足迹遍及美國、汶萊、關島、尼泊爾、南極、德國及澳洲等地。07年他先後轉做市場推廣及公關，但姣婆守唔到寡，今年加盟now主持旅遊節目《一個地球》，本月更會推出旅遊書《Tony的秘密假期》。
