新地主辦嘅第二屆「年輕作家創作比賽」今年有逾千人投稿，噚日宣佈其中8位作家脫穎而出，佢哋嘅大作本月書展有售。
八個年輕作家各有特色，立體書《香港彈起》最過癮，同大路平面書完全唔同，揭開會彈出六款香港特色建築物紙雕，包括唐樓、木屋、公屋等。
作者劉斯傑本身都係彈彈吓坐唔定之人，佢本來係動畫公司創作總監，但為咗整立體書，竟然辭職全身投入，朝早6點起身，剪剪貼貼做到深夜12點，有時甚至會通頂，隨時辛苦過打工。唔好以為手作仔好簡單，佢去年買咗好多外國出嘅立體書參考，將書中恐龍拆骨，研究當中機關奧妙，舊年7月決定整《香港彈起》，足足一年先至面世。