吳日言與歐陽靖（MCJin）合作主持飲食節目，兩人雖然首次合作，但很快便混熟，更不時互窒，Yan指MCJin是新一代師奶殺手，每到一個家庭，都逗得媽媽級的女性高高興興，非常受歡迎，MCJin就讚Yan入得廚房出得廳堂，是一個好老婆，但一定不是他老婆。
吳日言（Yan）與歐陽靖（MCJin），一個港女加一個ABC會有甚麼搞作呢？兩個膽粗粗一起主持now香港台的飲食節目《Cooking媽嫲》，走遍全港的大小家庭，跟着人家的阿媽阿嫲去街市買餸，再去埋人屋企，睇住人煮，再等食住家菜。
大讚識搞氣氛
阿Yan首次同MCJin合作，起初都擔心彼此溝通有問題，不過合作之後，可以話一拍即合，Yan說：「原來佢好香港仔囉，個人又搞笑，好識搞氣氛，同佢拍嘢都好開心。」她更大爆MCJin是新一代師奶殺手，每個家庭的媽媽級女性都非常喜歡他，Yan謂：「佢成日講笑啲媽媽，個個都爭住同佢講嘢呀。」
MCJin不承認也不否認，只說：「我都係想搞氣氛，我發覺我做少少好普通嘅嘢，佢哋就好開心，咁我咪做多啲囉，有乜所謂。」
整雞翼甩晒皮
節目中二人都有下廚，自製最拿手的菜式讓大家品嚐，MCJin大讚阿Yan廚藝了得，他說：「阿Yan做老婆真係得，入得廚房出得廳堂，不過唔係做我老婆。」至於MCJin的廚藝，阿Yan苦笑說：「都可以食嘅，佢煮蜜糖雞翼，都唔會難食得去邊，不過皮同肉就分開晒囉。」
採訪：胡比 攝影：陳順禎
場地提供：LEICHTKitchen
服裝：A/T（吳日言）
髮型：VicofHairCulture（吳日言）
化妝：Annie（吳日言）