「嘩！Super！」以前幾乎每個星期都會聽到曾志偉沙啞的聲音，以獎門人的身份搞笑，戲弄不同明星為大家帶來歡樂。10年過去，獎門人變美女廚神，搞笑變成靚女低胸煮飯。電視暫時不會再看到獎門人，但志偉和一眾獎老製作了《獎門人通勝》，將10年笑料濃縮其中，每日總可揭一頁，笑一笑。
無綫播映的《超級無敵獎門人》轉眼10年，每次播出總是笑聲不斷，但其實現場的NG情況更好笑，獎門人加獎老，口不擇言狂寸嘉賓的情景，俱往矣。今年志偉加上錢嘉樂、阮兆祥、王祖藍一起製作《獎門人通勝》，將過往笑料爛gag無聊IQ題都收錄其中，又有嘉樂教自衞術、祖藍教英文、祥仔教猜拳媾女，旨在令大家笑得開心。早前4人一同接受訪問，其間一直冇時停，不斷取笑現場記者，又反客為主訪問記者，笑聲四起。
女裝志偉做封面
曾志偉扮正經說：「呢本嘢我哋籌備經年啦，以後每年都出，不過都係出同一本。其實下次係出黃頁，出晒所有記者同明星嘅電話，哈哈哈。」他又自爆邀請了多人作序，不過全被拒絕，最後只好4人自序，還會將拒絕者名單落齊。
《獎門人通勝》首批印刷3千本，準備力撼一眾o靚模的寫真集，祥仔拿着印有志偉女裝打扮的樣本書說：「今次我哋個封面以1敵9呀，今年書展又有Angelababy、又有ALin嗰8個，我哋冇理由唔出吖。我哋將全香港好多靚人都試過放落去，最靚係呢個㗎喇。」嘉樂又說：「我開始老人癡呆，唔寫唔記得嘛。」問到可會像陳志雲或一眾o靚模一樣現身書展為讀者簽名時，志偉說：「會去簽名嘅，當係舒吓筋骨囉。」
教玩遊戲接新娘
志偉又笑說：「下次都係出字典好啲，好似『茄』以前係屙嘅，家會變咗係索嘅，以前啡色，家又變咗白色。」問到可擔心教壞小朋友時，他說：「講笑啫，總之本書嘅內容就一定係老少咸宜啦。」
祥仔又提到書中除收錄笑料之外，又設計了一系列遊戲，可供一家大細聚會時玩樂，不論同學去露營，甚至結婚接新娘也通殺。負責宣傳的梅小惠，則為他們作總結說：「其實大概籌備咗一個月，內容包羅萬有，祖藍就諗低能英文、志偉就諗10個冇可能嘅任務，嘉樂就諗大圍一齊玩嘅遊戲，總之就係要延續《獎門人》嘅開心氣氛啦。」
採訪：藍文浩 攝影：陳俊強
