吳亭欣（LuLu）前緋聞富商男友馮潮澤嘅太太、即係顧美華嘅妹妹顧麗華早前自殺身亡，盛傳LuLu因為亂搞男女關係而俾亞視雪藏兩個月，直至噚日，LuLu終於解凍復工，獲安排喺大埔總台宣傳外購劇《麻辣鮮師》，仲同最近隔空罵戰鬧不和嘅筱靖一齊着校服扮純情學生妹兼扮老友。不過，LuLu同筱靖好明顯口和心不和，LuLu唔單止周身唔自然，仲經常強顏歡笑。
口供唔夾
LuLu同筱靖喺傳媒面前好識做咁攬頭攬頸影相，話大家冇嘢，但佢哋接受訪問時口供明顯唔夾。LuLu話：「佢之前打畀我，有誠意道歉我都會接受。」筱靖就否認話：「我有主動打畀佢，但我冇道歉，係講番件事，當初我覺得事實係冇必要解釋，清者自清，先拖到噚日先打畀佢。」
另外，LuLu話自己冇同馮潮澤聯絡好耐，問到感情生活，佢話：「我有自己嘅感情生活，我想低調啲，可唔可以畀空間我，我相信個男仔係好鍾意我係唔會介意，亦唔會有咁多顧慮。」