嘭嘭嘭！呢期冇好波，深宵翻煲劇集成為唔少波迷嘅精神食糧，我求大俠前晚就好肉緊咁睇《陀槍4》，睇住小生喺射擊計時賽以0.01秒輸俾情敵鄺sir，冇咗「警界神槍手」名銜事小，喺愛人面前出醜打擊至大。嗱，曼聯領隊費格遜、巴塞隆拿教練哥迪奧拿近排瞄準收購目標後，幾乎槍槍落空，連彼此「心儀」嘅列貝利都表明只愛皇馬，嗰種失落、傷痛，怕且拍得住小生。
曼聯賣走基斯坦奴朗拿度（C朗）後，據講費Sir有8,000萬鎊（約10.2億港元）招兵買馬，扣去買路爾斯華倫西亞嗰1,600萬鎊，仲大把「子彈」喺手，偏偏一眾獵物，好似賓施馬俾皇家馬德里搶走後，連列貝利都凍過水。呢位26歲法國「疤面煞星」嗰頭做完跟拜仁慕尼黑開操場大龍鳳後，轉過頭就誓神劈願話：「我走硬，但非皇馬不去。」
奧雲投曼聯賠率異動
人家個心都唔喺紅魔度，費Sir可以打定輸數，但觀乎市場，好嘅勁嘅，唔係唔肯走就通通去晒皇馬，家陣仲可以爭而有份量嘅，大概只得阿古路、馬斯真蘭奴、沙比阿朗素等人，唔通真係衰到要簽已經係自由身兼過晒氣嘅奧雲返嚟？因為英國博彩公司SkyBet突然將奧雲加盟紅魔嘅賠率，由廿幾倍大幅下調至2.75倍！
巴塞密密斟韋拿
當死敵皇馬猛人買完一個又一個，巴塞隆拿又係交投淡靜，去季3料冠軍搵咁多錢都仲未有碇使；好彩，得唔到列貝利個心，都仲有個當紅炸子雞韋拿。據西班牙傳媒講，呢個華倫西亞射手早前同巴塞總監碧格利斯坦秘密會面過，轉會應該冇走雞。
仲有，多得美斯做說客，佢嘅阿根廷同胞馬斯真蘭奴都有望由利物浦加盟，點睇，巴塞個境況都比曼聯好。呢場「買人槍擊戰」擺明鬥準鬥快，費Sir想重奪歐聯錦標，真係要爭分奪秒囉！