前日大遊行港大民意研究計劃派出72人做問卷調查，參加遊行人士可能都見到身穿印有「港大民研HKUPOP」制服嘅人員喺度工作。有網民報料，指遊行時有個少女自稱係民調中心人員，要求做民調。呢位網民起疑，要求對方提供所屬機構背景，少女僅提供查詢電話，後來查證，原來係隸屬一國兩制研究中心嘅「香港民意調查中心」。
一國兩制研究中心總裁張志剛話畀八方知，7.1佢哋確有派人做問卷，了解市民上街理由，結果供內部參考。佢指調查員均曾受培訓，以專業態度做調查，絕對不會冒名訪問。港大民意研究計劃總監鍾庭耀稱暫未接獲有關冒充做民調投訴，若情況嚴重會考慮報警。兩個民調機構名稱咁相似，又難怪市民混淆。