早兩日載住兩位貌似o靚模嘅後生女，由銅鑼灣入赤鱲角，大長途梗係開心喇，不過佢哋八八卦卦咁細聲講大聲笑，悶起上嚟惟有PushtoTalk同鹹蛋黃傾偈囉，「老黃，乜環境呀？」「唉，做極都係猜枚客，條街又靜，今日想過山都幾難。孖三孖八就好景喇，上頂兼落井，你又點？」「OK啦，執咗支靚籌入緊機場，不過係空手道，一粒石仔都無。」講到呢度，兩位靚女忍唔住插嘴，晒頭問我哋傾緊乜嘢。其實呢堆係的士行內術語，猜枚即係短途客，唔係15（蚊）就20（蚊）完事，過山即係過千蚊生意，上頂落井指上山頂同落深井，而空手道即係齋坐無行李附加費，石仔就係指行李喇。「嘩，超低能呀！」係呀，老一輩嘅術語後生女邊識吖，呢啲咪叫代溝囉，我夠覺得你哋低低BB勁搞笑咯。
文：黃師傅