劉德華97年喺台灣拍攝電影《黑金》，當時電影公司向德安航空租咗架直升機，有幕講華仔喺直升機跳落嚟，點知過程中直升機下沉，搞到旋翼葉片打中地面嘅聚光燈而受損，直升機公司04年入稟台灣地區法院，控告劉德華、《黑金》投資公司永盛娛樂（即中國星集團前身）同製片王重正。
上年4月，法院判咗要華仔賠償510萬新台幣，當時華仔上訴話直升機係俾「不明飄浮物」撞擊，以及係機長冇坐喺駕駛座所致，同佢無關，但噚日高等法院仍判佢賠償669萬新台幣。
噚日台灣法庭消息指，當年嘅機長出庭作供，佢話已經提醒華仔唔好碰到操控桿，並指係華仔大腿撞到操控桿所致。法官指導演要求機長唔好出鏡，華仔方面點能夠責怪機長冇坐喺駕駛座，而且華仔碰到操控桿先係事故主因，所以唔單止要賠，仲比一審時多咗159萬新台幣。
向太指再上訴
華仔嘅台灣映藝媒體總監宋幸娟話：「此事已進入法律程序，經紀公司不便回應，華仔在橫店拍戲，也無法取得他的回應。」中國星老闆娘陳嵐就話：「家同律師研究緊再上訴，佢哋唔係啲乜要加賠，其實係加埋啲息，件事同華仔無關，華仔只係拍戲。」有指華仔碰到操控桿致意外，向太話：「邊隻眼見到華仔，唔好賴人，啲燈位係台灣啲工作人員擺㗎，架直升機係唔郁嘅，都冇起飛，華仔只係坐喺度扮嘢，架機由工作人員控制。」向太話會上訴，仲話唔爭在再打埋呢場官司。