求驗客手記:囂爆細威獎盃裝化妝品 - 求驗客

求驗客手記:囂爆細威獎盃裝化妝品 - 求驗客

茶「杯」嘅作用係嚟裝茶,咁獎「盃」又有咩用呀?美國女子網球手莎蓮娜就話,大大個獎盃,當然係用嚟擺化妝用具啦!綽號「細威」嘅莎蓮娜,真係將辛辛苦苦贏番嚟嘅獎盃用嚟裝化妝筆、化妝掃;佢仲對自己能夠發揮無限創意感到非常自豪,話自己為「冇用」嘅獎盃重新賦予新生命!

成屋獎盃阻住化妝

網壇聽咗莎蓮娜呢個名字好多年,之不過唔好以為佢年過30歲嘅中女,查實莎蓮娜今年只得27歲,不過佢已經打咗14年職業賽囉!「細威」打波威力無窮,每逢比賽就好似變咗「大力猩猩」咁,氣力十足嘅佢周二仲牙擦擦話,就算女單轉制,好似男單咁打5盤都冇有怕!
莎蓮娜習慣將對手殺個片甲不留,所以佢職業生涯就已經贏咗10個大滿貫錦標,加埋其他大大小小賽事,結果搞到佢屋企充斥咗大小不一嘅獎座、獎盃,總數超過33個!莎蓮娜唔知點處置啲獎盃,因為阻住佢喺間房度扮靚靚畫眉;有日佢突然靈機一觸,既然獎盃擺喺度冇用,就用嚟做容器吧!

貪靚廣為人知

莎蓮娜貪靚喺網球圈已廣為人知,佢以自己一身黑漆漆膚色而好自豪,每逢出席賽前記者會、贏咗大滿貫嘅慶祝典禮,都會盛裝出席,自覺用白色裙襯佢「黑珍珠」般嘅美麗動人一面;即使比賽服飾亦落足心機,襯以顏色鮮艷嘅戰衣上陣殺敵,務求要喺球技同外表上贏晒對手,真係令我求大俠佩服!
之不過大家唔好以為莎蓮娜只識貪靚,攞啲獎盃嚟裝化妝品,以為佢忽視啲獎盃;查實佢已經為每個獎評分,莎蓮娜話喺咁多個獎盃入面,就以01年贏嘅印第安韋爾斯獎盃最好用、最稱職!