捍衞人格尊嚴協會吹雞7.1搞遊行，呢個A貨遊行雷聲大，噚日在維園草地集合，八方好奇一看，發現只有十幾廿人參加，唔計搞手同工作人員，參加市民相信一隻手數得晒。八方問過幾個在場後生仔點解要上街，佢哋同一口徑：「無可奉告。」
協會副會長李慨俠話之前發信畀超過二萬人；動員效果咁差，佢一賴天，歸咎太熱，二賴地，「可能啲人行晒過隔籬（民陣遊行）。」呢個遊行要求改革司法制度，增設「民間公義法庭」，由市民做法官。
反泛民成員有背景
「反泛民大聯盟」噚日早上在灣仔遊行至立法會，有近40人參加，佢哋批評泛民唔代表民意，又指泛民議員講粗口、騎劫預算案，總之講到有破壞冇建設，要求立法會主席曾鈺成處理。發起人王先生聲稱大家只係志同道合網民，冇政黨背景，不過佢哋整晒大大幅橫額，又有倒泛民貼紙，顯然有備而來，並非烏合之眾。
王先生企得出嚟，卻拒絕透露個人資料，有網民在facebook發現呢個聯盟嘅成員包括工聯會幹事同民建聯黨員，幕後搞手是誰，呼之欲出。